間中通下頂變咗件好平常嘅事，
嗰朝攤上帘卷西风床已經係八點九個字，
偏偏瞓唔著又唔想打開部電視，
懶得煲電話就唯有睇下舊雜誌。
封面嘅lady係呢個Angelababy，
豹紋加lace簡直就狂野兼sexy，
裡頭嘅文字講述啲成功型男士，
傾下非公事再教你玩物要有致。
大幅嘅廣告閑閑哋霸曬兩版紙，
品牌超奢侈仲有啲未識嘅名字，
姐姐阿媽嚟D與G囂哥嘅波士，
ben仕法拉梨四環素波子布加tti。
唔經又唔覺就嚟到九點八個字，
個人飄飄然打喊嚕滿眼紅血絲，
拉冚曬窗簾戴眼罩暗啲好瞓啲，
唞返一陣先精神啲再寫下rap詞。
己丑重七，悶熱，暴曬轉陣雨，有OT。
喺廣大而非僅廣大嘅人民嘅開工時間OT，當大家放工嘅時候，又跟住啲坐咗成日寫字樓監嘅五顏六色領放工去whet。
麻甩佬，
醫飽肚，
冇嘢做，
走去蒲。
喂~唱K囖！整返首《黑擇明》先喇：
“情緒或高或低如此詭秘
陰晴難講理
既然浮生就如遊戲
不如坐戰機”
呢期七夕嘅氣氛都幾濃厚下，就講唱完K出K房嗰下喇，就見到間嘢派花畀女仔嘞。跟住又有大打七夕牌嘅吳克群演唱會。仲有我哋單位嘅麻甩佬部——IT部同另外一個冇乜麻甩佬嘅部門嘅聯誼活動。我同team裡面啲麻甩佬講，與其話係聯誼活動，不如話係“濕身活動”。事關活動場地係喺呢個搞緊“潑水節”嘅錦繡中華。嘩！咁好嘅活動我有咩理由唔參加啊？喂，有咩理由啫？話我知啊——理由係，你嗰日要返工，冇得參加...“情緒或高或低如此詭秘，陰晴難講理”
除咗外面嘅節日氣氛濃之外呢，坐喺屋企漚都好有氣氛。一上網就見到成堆簽名有“七夕”兩粒字。記得細個嗰陣呢，除咗學過幾首情詩詞之外，都冇乜點聽過“七夕”嘅，好似係近幾年先出現嘅新玩意。究竟係咪06年畀人列咗入非物質文化遺產嘅原因呢？抑或係商業化嘅炒作？呢條橋幾點喎，比“保持適度寬鬆嘅貨幣政策”更有利於促進荷包發脹，至少以前一年一鑊嘅貴價花節變咗一年兩鑊，每半年整一鑊賺到笑。照計就係國人過呢個節日咋喎，國際花價係呢個時候都唔會突然升高喇。成本不變，售價升高...再講落去，我直頭想喊添嘞——冇攞花嚟賣啊~百合炒玫瑰啊~
整首幾商業化嘅歌安慰下自己先：I want nobody nobody but 妞...
炒樓、炒股票，係時下啲街坊周不時都會講到嘅話題。因為可以錢揾錢吖嘛。但係炒車呢家嘢就比較少，事關呢家嘢冇生財嘅作用不但祗，仲會破財添。
以前睇電視新聞，會發覺廣州地區同香港地區嘅內容有一點好唔同，就係香港地區嘅新聞時不時都會報道啲炒車嘅新聞，而廣州地區嘅幾乎冇。嗰陣就覺得，香港新聞會唔會因為要報道嘅範圍比較細，唔似得大陸地區啲新聞，又要講本市，又要講本省；又要講農村，又要講城市；又要講街坊，又要講阿爺。既然香港要講嘅嘢唔夠多，噉就插啲炒車報道出嚟囖，影下部車個殘樣，影下將個傷者送上白車嘅情景，等你睇到心驚驚，開車出街都要打醒十二分精神。再加埋啲交通安全嘅公益廣告，出門口都會醒水啲。
近排再留意返啲新聞就會發覺，大陸地區開始慢慢注重對炒車新聞嘅報道。咩廣州午夜迷情舂落珠江啊，杭州物理實驗“七十碼”啊，南京酒後捏車大屠殺啊等等。一開始就覺得電視臺冇節目好播，諗諗下唔多對路，求其走去村口影低旺財喺棵風水樹度吠都可以講半個鐘喇，唔可能冇嘢播。又或者電視臺喺度提醒緊大眾要注意交通安全？開車前咪飲？開車前唔好捱夜？好似有啲近傍。不過通常呢啲新聞嚟個驚險刺激之餘仲加埋啲撲朔迷離。幾乎都有“續集”，又咩狗男女投江殉情喇，又咩以權謀私包庇縱容喇。噉咪即係將真實故事改編成連續劇？
實在估唔到新聞編輯嘅心思。以後會唔會出現車市投資就唔知，不過就算有，都唔會叫“炒車”，呢兩個字，都係出現喺啲任“炒”唔嬲嘅賽車遊戲裡面好啲。
出生喺人稱“文化沙漠”嘅我，曾經以為呢度沙漠化嚴重，冇文化嘅人比比皆是——好似我呢種冇睇過大部頭嘅人，會越嚟越多，長期落去，呢個“番禺”就真係會變成“南沙”。
細細個嗰陣，
走咗去學琴；
上堂坐唔穩，
重要搞搞震；
亂彈又亂哼，
先生發‘掹囎（meng2 zang2）’；
老竇頭都痕，
帶我新大新。
當年都唔知係咪因為太細個，兼且又畀老竇啲收音機胎教影響咗，音樂方面嘅表演欲爆曬燈。琴班老師先教咗兩堂課，我都未知學咗乜就已經沙膽到大展歌喉，重自己伴奏，直頭係變咗牛對人彈琴——亂嚟。見到我無心向學，大鬧琴房，老竇唯有帶我玩另一樣嘢——逃課。去邊度？一於就隔離新開嗰間新大新喇——就噉樣畀新大新阻擋我我成為偉大鋼琴家嘅道路。（如果我真係做咗鋼琴家，會唔會起藝名叫“琅琅上口”呢？事關我唱埋嘅喎。）
從“象獅虎豹狗狐貓鼠”到“公車馬砲仕象卒”，從“黑色白色兩種”到“黑色白色兩面”，從水平到垂直——識玩嘅棋都尚算要用兩隻手先數得曬，衹不過一直冇好好研究過，凈係覺得國際象棋裡面個王太孱弱嘞，反而佢老婆就好把炮打橫打掂打斜點樣飛都得。諗諗下，中國象棋之所以冇好似印度象棋噉成為國際象棋，都係因為冇搞好國際化，用漢語版咁多年都冇出過其他語言版本包括符號語言版，造成咗外國友人嘅理解障礙。至於軍棋嘞喎，打嚟打去都係背靠背，重要畀人望住先玩到，噉你話幾唔好呢。
好多人見過我手字都話，鬼畫符就聽得多嘞，人畫符就第一次見。啊，你話如果呢個世界上真係有邪魔妖怪嘅話，見到我會唔會特別驚呢？喂，鬼仔，得鬼閑冇事做都唔好行埋去啊，佢識畫符咖，好得鬼驚！可以辟邪就梗系冇問題喇，衹不過如果連想嚟幫我嘅神仙或者都嚇走埋就唔好喇。鄧伯伯話齋，“娃娃要從計算機學起”，噉即係提醒我哋學咗計算機之後要練字。
畫畫同書法有好多關聯嘅地方。一個書法麻麻嘅人，畫功一般都唔好得去邊。睇咗我啲畫之後，有人嘅反映係：“意識流？”“錯！係后意識流。意識流係一般人睇唔明，但係藝術家睇得明嘅；而后意識流係連藝術家都睇唔明，得我睇得明嘅。簡單啲嚟講就係非主流喇，你咁主流唔會明嘅嘞。”諗翻起細個嗰陣，屋企買唔起嗰種有十幾廿隻色嘅畫筆套裝畀我，就喊到好似劏豬噉聲。但其實有畫筆又有乜用啊？都唔會好似達文西（Da Vinci達•芬奇）噉畫雞蛋畫到打印機噉，張張一樣。我最多咪畫雞蛋畫埋啲腸出嚟——實質上我係畫緊卡通肖像嘅…
講到阿文西Da Vinci，琴棋書畫幾乎‘飯飯皆蒸’（“樣樣都叻”嘅意思。呢個俗語識寫，麻煩高手指導一下，尚且用同音字意思意思一下），連唱歌都咁洒家。反觀下自己，琴棋書畫都“爛”曬——係漚爛而唔係蒸（精）爛。粵劇都衹係識兩句廣東南音：凉风有信，秋月无边。思娇情绪好比度日如年。頂多就係學劉德華噉唱《神雕大俠》。至於數白欖嘞喎，根本就達唔到咁高層次，好似痰上頸噉，最多衹可以稱之為說唱。
“沙漠化”咁嚴重，會唔會無法翻身呢？你睇下呢邊一落大雨就水浸街就指導唔會喇。因為有熱情，好似一把火噉，將成個“沙漠”都燒到興曬。全方位多角度噉令到呢度形成低氣壓，從而形成大範圍降水，滋潤每個細微之處，重建原有嘅綠洲。
地球一小時活動宣傳到通街都知，簡單嚟講就係呼籲大家喺聽晚八點半"熄燈"一個鐘。同時世界各地啲著名建築物都會喺嗰陣喺咗外墻嘅燈，而某啲大型超市都會熄三分之一嘅燈作為響應順便宣傳。
有媒體采訪咗部分人士，叫佢哋講講對"地球一粒鐘"嘅睇法，以及喺呢個鐘裡面會做乜嘢。"會響應號召熄燈。""呢個活動可以增強我哋啲環保意識。""啲高樓熄咗啲燈，我哋可以睇星星嘍。""電視同電腦我都唔開。""出街放狗。""食燭光晚餐（宵夜）。""早啲上帘卷西风床（唔知係咪瞓覺嘅）。""同條女拖住手仔，傾住密偈。""做俯臥撐，玩‘伏匿匿'（躲貓貓）。"
計我話，呢個活動好係好，可以喚醒一下大眾嘅節能意識，只不過如果衹係做個形式，走個過場，就真係冇乜作用。一年搞一個鐘，就已經宣傳到可以慳咗幾多幾多能源，噉如果個個月搞一鑊，個個星期搞一嘢，甚至日日都執一劑，噉報紙咪唔使報道能源危機？如果唔凈係熄燈，重熄埋啲著橙燈（待機）嘅顯示器，開住又唔睇嘅電視機，大熱天時重煲成日嘅電熱水器等等，噉咪 ** 電廠都要面臨執笠？
見到呢個標題，唔知大家會唔會諗到一味餸——用杏仁同鮮橙整成嘅齋菜——雖然我未見過；又或者諗起當年睇《蠟筆小新》（粵語版）嘅經典對白——粗口我就唔打出嚟嘞，不過個翻譯用個噉嘅“詞組”去代替句粗口，教壞曬啲小朋友——係教壞咗個讀法，搞到啲小朋友講懶音，認真“冚家祥”。
講到“冚家祥”，就唔可以唔諗起恒×祥——一個用虐佳节又重阳待人嘅手法強逼你記住佢嘅品牌。一次又一次噉簡單重複，一輪又一輪噉疲勞轟炸，直頭會令你憎到一見到佢出嚟就轉臺。記得呢個品牌總共出咗兩個版本嘅廣告。08版嘅完全冇技術含量，成個畫面得個白屏同埋個奧運LOGO，整幾隻醜陋嘅生肖公仔閃幾嘢，噉就叫做廣告嘞——小學生都識喇，咩廣告公司咁低能啊（我好想見識下）？跟住09版嘅就稍微好小小，起碼有幾個真人喐下，再加上啲音樂調和下，重算好些小，不過啲重複對白又真係冇乜深度，睇一次都唔想再睇第二次。
以前喺視頻網站睇過一啲短片，講有啲靚女揸車技術認真嘛嘛，簡單咁轉個彎仔都會炒嘅。喺平時生活當中，係就係聽過話靚女揸車“有辣有唔辣”嘅，不過嗰條短片嗰啲太夸張嘞，好彩冇見過，估計考試都唔係正常咁考過嘅；至於開得好辣嘅靚女呢，睇電影就睇得多嘞，現實中都係未有機會見到嘅...
兩個極端都未有機會見到，噉穩打穩紮開車嘅靚女見過嘞啩。路上面大把喇，今日又畀我見到一個。不過呢個有啲特別，佢開嘅唔係一般嘅車——冇V8引擎，冇四輪驅動，冇加場車廂，冇強勁音響，冇豪華內飾，冇語音導航，兼且冇ABS同香水——呢部重係唔係一部車嚟咖？係，係一部具有成米咁長嘅波棍，軟‘熟’過屋企張sofa嘅司機椅，成個平方米咁打嘅車窗，前後置總共成五六隻喇叭，中央換氣空調系統，以及可容納四五十人嘅寬敞車廂嘅——公交車——俗稱巴士。
我一上佢部車，已經畀佢嘅驚艷攞咗我嘅七魄（雖然我喺見到佢之前係游緊“三魂”嘅狀態）。廿零歲（粗略估計，誤差唔到十年，怕且佢都唔係十幾歲嘅僆妹啩），樣唔錯（直頭係五官端正形象佳氣質好，可以代言婚姻介紹所廣告），飄逸嘅長髮（幻想啫，上班係紮咗辮嘅），一身整齊嘅著裝（俗稱“制半夜凉初透服誘惑”）。哎！噉把聲又如何啊？喺呢個moment佢居然主動開口同我講嘢：“靚仔！畀錢啊！”直頭係甜而不‘餾’，甘而不苦，我即刻撚出一把靚聲回應佢：“靚女！唔好意思，我重以為呢部車係有人售票添！係咪兩文啊...”一路坐佢部車，手車唔錯吖，‘堂肽’幾定，入彎踩brake換檔都好順。搭咗兩個站，我終於忍唔住要開口同佢講嘢嘞：“有落！”跟住好唔情愿噉落咗車，七魄依然未返到我嘅身體...（兩文凈係搭咗兩個站咁尐多，梗係唔想落喇；落車之後仍然處於游緊“三魂”嘅狀態）
水就吹到呢度，大家當玩下好嘞，裡面啲對白都係我作出嚟嘅啫。不過講句老實話，咁靚嘅女巴士司機都係第一次見。難怪Fan少猛咁贊深圳多靚女喇，都唔知係咪喺啲靚女車手架車度游車河嘅。
左抄西抄，進進出出，搞咗成朝，搞到個人‘慶’曬，終於揾到某個咸豐年登錄過嘅網站嘅注冊郵箱賬號...
家下網絡時代，搜索當道，廣大網民嘅大腦有退化趨勢（某啲生理學專家講嘅），但係偏偏就係要記住一打賬號同密碼。多年前接觸過OpenID呢家嘢，係就係覺得唔錯，一個賬號可以喺多個唔同嘅地方登錄，就好似passport噉，就弊在冇咩網絡服務運營商用佢。搞嚟搞去，都係“免費注冊”嘅錯。免費郵箱人均都唔止“一隻手”，免費賬號都注冊到唔記得注冊過未。一下子成堆賬號擺喺面前，除咗常用嗰啲，剩低嘅都唔知邊個打邊個。
究竟身份驗證問題幾時先有好嘅解決方案呢？以第三方方式驗證嘅有流行多年嘅簽名驗證VeriSign之流喇，不過要周期性噉畀錢就冇咩人肯；手機短信動態驗證碼式固然係好，但係網站服務運營商冇一定規模都畀唔起錢去搞，而且一般嚟講有地域性限制，暫時未接觸到肯發國際短信嘅；至於OpenID，明顯係第三方，免費（有可能係“未開始收費”或者“增值業務收費”），只不過未遇到伯樂。
從前有位女士，嫁畀一個男人，有咗佢嘅骨肉。不過呢個女人‘馱’咗個BB半年嘅時候突然就查出自己患上癌癥。當佢知道做治療會好大程度上影響胎兒嘅時候，佢選擇咗放棄治療，生個BB先。后來佢BB仔出咗世，但係自己就永遠噉離開咗老公同個仔。
開頭見到呢個古仔，就覺得：哇～母愛真係偉大嘞。連自己條命仔都唔要，都要堅持生自己嘅骨肉出嚟。呢個女人對佢個男人真係好嘞，sei都要幫個男人生番嘅仔繼后香燈。（呢度冇重男輕女嘅意思，純粹按照傳統思想推斷）
但係諗深一層，呢位女士嘅選擇實質係同時傷咗兩個男人。尤其係佢老公。佢老公眼白白噉睇住自己個老婆忍痛捱苦，跟住離自己而去。然后要一個人‘湊’住個細路，又做老竇又做老母。兼且個細嘅又唔知會唔會受佢老母嘅病情影響，生理上有咩缺陷，噉個老公又要擺多幾分心機去照顧個仔嘞。講返個一出世就唔知阿媽咩樣嘅細路，成長環境就已經同其他家庭嘅唔同，再加上佢“可能”有嘅缺陷，會畀其他人所承受嘅壓力要大。
或者，呢位女士做另外一個選擇嘅話，個古仔會有一個更特別嘅結局...
今年嘅叱咤臺係屬於《喜帖街》嘅，但係利東街唔係屬於大家嘅。
簡單嚟講，有啲嘢都唔知點開口講，唱隻歌仔算嘞：
離去了老廣州，從西關出發，去到了東站
搭上那穗深的車組，我正是要出走
嬲嬲哋，人孤身上路，不會內疚吧
其實夢想天天開心快樂，有老友打波
...
